TIGBAUAN, ILOILO - Agaw-atensiyon sa bayan na ito ang kulay-rainbow na pedestrian lane na layong ipagdiwang ang mga karapatan ng Lesbian Gay Transgender and Bisexual (LGBT) community sa bayan.

Ito ang "Pride Pedestrian Lane," na itinuturing na kauna-unahang pride pedestrian lane sa Panay, ayon kay Carl Taleon Tuvilla, presidente ng lokal na LGBT group na "Tigbaw Pride.”

Makikita sa Allera St. ang naturang pedestrian lane na isinagawa sa pamumuno ng Committee on Tourism ng Sangguniang Bayan ng Tigbauan at pininturahan nitong Marso.

Layon nitong maipakita sa publiko na ang kanilang bayan ay nagbibigay-respeto sa mga miyembro ng LGBT community.

Sa pinadalang mensahe ni Tuvilla sa ABS-CBN News, ikinatuwa niya ang naturang hakbang, na umano'y patunay ng pagtanggap ng kanilang bayan sa mga miyembro ng LGBT community.

"[I am] truly honored and proud that the Municipality of Tigbauan with the help of Mayor Suzette Alquisada and SB Member Gerrylyn Camposagrado recognized and [honored] us with this kind of project. Acceptance, love and respect [are what] we are fighting for and we truly experience it in our town,” ani Tuvilla.