Tumatawid na lola, patay nang mabunggo ng motorsiklo

Kim Lorenzo, ABS-CBN News

Posted at Mar 21 2018 04:30 PM

BATAC CITY- Patay ang 88-anyos na si Maximiana Marcos matapos mabunggo ng motorsiklo sa Barangay Baay sa lungsod na ito nitong Lunes.

Nagtamo ng sugat at nabali ang ilang parte ng katawan ng biktima na naging sanhi ng kaniyang pagkamatay.

Ayon sa imbestigasyon, tumatawid sa national highway ang biktima nang mabunggo ng parating na motorsiklo na pagmamay-ari ng isang remittance center.

“Nag-overtake 'yun motorsiklo sa isang motorsiklo at nang maka-overtake ay bigla siyang nagpreno dahil may matanda na tumatawid pero nawalan siya ng kontrol at na-slide at dumeretso ito sa matanda,” ani SPO1 Darwin Quiaoit, imbestigador ng Batac City Police.

Nagtamo ng minor injuries ang driver na si Joemar Pacete na delivery boy ng remittance center.

Hindi pa nakapagdesisyon ang pamilya kung magsasampa ng kaso.

Kung hindi na-areglo, mahaharap sa reklamong reckless imprudence resulting to homicide ang driver.

Bisitahin ang Patrol.PH para sa iba pang mga balita.