MAYNILA - Higit 60 ang bilang ng mga bagong nahuling residente na lumabag sa unified curfew hours sa Caloocan at Navotas.

Sa Caloocan, mula sa 80 indibidwal na nahuli nitong Lunes, bumaba sa 58 ang bilang ng mga nagpalipas ng gabi sa kanilang temporary custodial facility. Ito'y mga residente na nahuling nasa kalsada kahit nakairal ang curfew na mula 10 p.m. hanggang 5 a.m.

Ang mga nahuli ay tiniketan at sinailalim sa seminar bago pinauwi.

Sa Navotas, mula sa mahigit 10 na natiketan sa checkpoint nila sa Radial Road 10 nitong Lunes, nasa 7 na lang ang natiketan Martes ng madaling araw.

Nasa mahigit 15 naman ang natiketan ng pulisya sa checkpoint sa C4 Rad.

Sa huling tala, 759 na kaso ng COVID-19 ang aktibo pa sa Navotas habang 756 naman sa Caloocan.--Ulat ni Lyza Aquino, ABS-CBN News