Watch more in iWantv or TFC.tv

MAYNILA — Nagkaroon ng aberya ang ilang checkpoint na itinalaga sa kalagitnaan ng Metro Manila quarantine.

Ito pa lang ang ika-2 araw ng community quarantine sa Metro Manila, at tatagal pa ito hanggang Abril 14.

Ipinatupad ito upang maiwasan ang pagkalat ng coronavirus disease 2019 (COVID-19).

Sa isa sa mga boundary ng Metro Manila at lalawigan ng Rizal, magkakatulong sa border check ang mga municipal health worker, traffic enforcer, at Highway Patrol Group.

Di gaya ng ibang checkpoint, walang nagche-check ng ID doon dahil naghihintay umano sila ng pinal at mas klarong utos mula sa mga kinauukulan.

Isa pang kapansin-pansin doon ang ilang thermal scanner na mababa masyado ang nakukuhang temperatura.

This enforcer’s thermal scanner at the Marikina-Cainta border takes about 10 seconds to scan, and has been reading temperatures of 31 and 32 degrees Celsius, lower than the average human body temp. Day2 of community quarantine and their overused scanners are acting up @ABSCBNNews pic.twitter.com/zOiME0cES6

— Chiara Zambrano (@chiarazambrano) March 16, 2020

Ang normal na temperatura dapat ay 36 o 37 degrees Celsius pero ang lumalabas sa ilan ay 31, 29, minsan pa ay 25.

"Medyo masakit na sa braso... Kasi alas-6 pa lang ng umaga namin ginagawa itong baril-baril," ani Rizalino Diaz, traffic enforcer.

Gayunman, wala namang mga motorista ang nagrereklamo.

Sa huling tala, 140 na ang bilang ng COVID-19 cases sa Pilipinas, ang 12 na dito ang namatay.