MAYNILA -- Nakarating na sa Pilipinas ang overseas Filipino worker (OFW) na si Virginia Dela Peña, Sabado ng umaga.

Dumating na sa Pilipinas si Virginia Dela Peña, ina ng apat na bata na pinatay ng kanilang amain sa Trece Martires, Cavite.

Si Dela Peña ay isang Overseas Filipino Worker sa Saudi Arabia. @ABSCBNNews @DZMMTeleRadyo pic.twitter.com/EcK9Poqb35

— Reiniel Pawid (@PawidReiniel) March 11, 2023

Si Dela Peña ang ina ng apat na batang pinaslang ng kanilang amain sa Brgy. Cabuco, Trece Martires, Cavite nitong Huwebes.

PANOORIN: Bahagi ng huling pag-uusap ni Virginia Dela Peña at ng kanyang apat na anak ang dapat sana’y sama-sama nilang pagdiriwang ng pasko ngayong taon. @ABSCBNNews @DZMMTeleRadyo pic.twitter.com/vgsF1BkQpF

— Reiniel Pawid (@PawidReiniel) March 11, 2023

Ayon kay Dela Peña, naging masaya pa ang huli nilang pag-uusap ng mga anak dahil pinayagan siya ng kanyang employer na sa Pilipinas sana mag-Pasko ngayong taon.

"Hinihintay po talaga nila ko umuwi ngayong December sabi po kasi ng amo ko mag-vacation ako ngayong December. Hindi ko po in-expect na ganyan ang mangyari," wika ni Dela Peña.

Desidido na rin ang OFW na bumalik pa ng Saudi Arabia upang matustusan ang gastusin ng isa pang anak.

"Sabi po ng aking amo, pag hindi ko pa kaya hanggang 3 months pa basta may contact ako sa kanila," dagdag ni Dela Peña.

Tiniyak ni Migrant Workers Asec. Venecio Legaspi na mabibigyan ng tulong sa ilalim ng reintegration program si Dela Peña.

Sasailalim din sa psychosocial intervention ang OFW. pic.twitter.com/w1yat2GW6T

— Reiniel Pawid (@PawidReiniel) March 11, 2023

Tiniyak naman ni Migrant Workers Assistant secretary Venecio Legaspi na sasailalim din sa health assessment ang OFW.

"Sa ngayon kailangan muna naming i-assess, importante kasi na magkaroon muna ng psychosocial intervention," dagdag ni Legaspi.

Makatatanggap din mula sa OWWA ng P20,000 cash aid sa ilalim ng "Balik-Pinas, Balik Hanapbuhay" program at P10,000 special financial assistance si Dela Peña.

Sumailalim sa medical assessment si Dela Peña bago dumiretso sa Taysan, Batangas kung saan nakaburol ang apat niyang anak.

Ayon kay Dela Peña, tatlong buwan ang ibinigay na bakasyon ng kanyang employer. Desidido siyang muling magbalik sa Saudi para sa kinabukasan ng isang anak. pic.twitter.com/bf9fKXPOgW

— Reiniel Pawid (@PawidReiniel) March 11, 2023

Samantala, nakaburol ang apat na bata sa lugar ng kanilang biological father sa Taysan, Batangas.

Wala pang eksaktong araw kung kailan ang libing ng apat.