Pasahero sugatan sa pagputok ng gulong ng tricycle sa Davao City

Berchan Louie Angchay, ABS-CBN News

Posted at Mar 10 2018 09:29 AM | Updated as of Nov 13 2018 08:33 AM

Iniinda ni John Gomez ang mga sugat na natamo sa noo at tuhod dahil sa pagkakatilapon mula sa sinasakyang tricycle na pumutok ang gulong, Marso 10, 2018, sa Davao City. Berchan Angchay, ABS-CBN News

DAVAO CITY – Sugatan ang isang 29 anyos na lalaki matapos tumilapon nang pumutok ang gulong ng sinasakyang tricycle, Sabado ng madaling araw sa Maa dito sa siyudad.

Pauwi na sana si John Gomez at tatlo pa nitong kasamahan galing sa isang pagtitipon nang biglang nagpagewang-gewang ang sinasakyang tricycle dahil pumutok na ang isang side wheel nito sa tulin ng pagpapatakbo ng driver sa Gem Village.

Tumilapon umano si Gomez at nagtamo ng sugat sa noo at sa tuhod.

Nasira ang isang gulong ng tricycle habang ang upuan pati ibang kagamitan ng mga pasahero ay tumilapon din.

Suwerte namang walang galos ang mga kasamahan ni Gomez.

Patuloy pa ang isinasagawang imbestigasyon ng mga pulis dahil tumakas ang driver ng tricycle matapos ang aksidente.

Posibleng maharap ang driver sa kasong reckless imprudence resulting in physical injuries.

Bisitahin ang Patrol.PH para sa iba pang mga balita.