DAVAO CITY - Lumalabas sa huling fire safety inspection ng Bureau of Fire Protection na bagsak kahit ang Davao City Hall sa safety standards.

Nasuring walang fire exit signs, fire alarm at fire detector ang nasabing gusali at napag-alaman ding hindi kumpleto ang mga fire extinguisher sa City Hall.

“Corrective measures [have] already been recommended,” sabi ni F/Senior Superintendent Neil Kwan Tiu, ang regional director ng BFP XI.

Aminado ang City Government of Davao sa mga kakulangan nila sa pagtupad ng fire safety standards lalo na lumang gusali na ang city hall at sa orihinal na istruktura nito, hindi na nalagyan ng fire detector, at fire alarm.

Pinagplanuhan na ngayon ng lokal na pamahalaan na maglagay ng saktong mga fire exit, fire alarm at water sprinkler bilang pagsunod sa fire safety standards.

“Mu-agad pud ta sa availability sa funds, ani Erwin Alparaque, ang Building Administrator ng City Hall.

(“Magdepende rin tayo sa availability ng funds”)

Kabilang din sa kanilang bibigyan ng pansin ang pagsunod sa fire safety standards ng Sangguniang Panlungsod, City Hall Annex at iba pang mga gusali sa City Hall.

Magsasagawa rin sila ng reorientation sa mga empleyado kaugnay sa fire drill.