MAYNILA (UPDATE) - Sugatan ang 2 residente at 1 fire volunteer sa sumiklab na sunog sa Barangay Tonsuya, Malabon nitong Huwebes ng madaling araw.

Umabot sa ikaapat na alarma ang sunog bago maapula pasado alas-6:03 ng umaga matapos ang 3 oras.

Nahirapan ang mga bumbero na maapula ang apoy dahil limitado ang pasukan patungo sa nasusunog na mga bahay, ayon kay Malabon City Fire Marshal Supt. Michael Uy.

Nawalan ng tahanan ang 150 pamilya at tinatayang nagkakahalaga ng P1.5 milyon ang natupok na ari-arian.

Ayon sa residenteng si Cheryl Reyes, sa katabing bahay lang nila nagsimula ang apoy na pagmamay-ari umano ng isang Lita Quitlong.

Nagising na lang umano sila na amoy usok na at nang sumilip ay nakita na nilang may apoy ang loob ng katabing bahay.

Mabilis na lumabas ng bahay ang pamilya ni Reyes at wala nang nadala kahit na mga damit sa pagmamadali.

-- Ulat ni Fred Cipres, ABS-CBN News ​