BACARRA, Ilocos Norte - May scaffoldings pa sa labas ng Bacarra bell tower nang buksan ito Miyerkoles ng umaga para mainspeksiyon ng Diocese of Laoag at ng National Historical Commission of the Philippines (NHCP).

Layunin ng pag-inspeksiyon ang makita kung may dapat pang kumpunihin sa bell tower bago i-turnover sa Diocese of Laoag.

Nilagyan na ng ilaw sa bukana at paakyat ng tower. Inayos na rin ang hagdan at nilagyan ng hawakan.

Tapos na rin ang view deck kung saan matatanaw ang ganda ng buong bayan ng Bacarra.

Ayon sa project-in-charge sa restorasyon, ang tower ay may taas na 29 meters. Hindi na rin ibinalik ang dome ng tower.

“Na-clear po namin sa taas, tapos with the existing structural columns po sa gitna, doon po namin sinet yung view deck,” ayon kay architect Genissa Villegas ng NHCP.

Papalagyan naman ng screen ang mga bintana para hindi makapasok ang mga paniki at ibon at hindi nila pamugaran ang tower.

Wala namang naging malaking pagbabago sa istruktura.

“Original yung mga bells kasi ang alam ng karamihan, ang bells ay nasa gitna. Pero ang mga bells ay nasa bintana. Yung gitna is the dome,” dagdag naman ni Msgr. Joey Ranjo ng Diocese of Laoag.

Kapag nai-turnover na ito, ang Diocese of Laoag pa rin ang mamamahala rito. Ipauubaya naman nila ang pagbabantay sa parokya.

Kahit na-restore na ang Bacarra Bell Tower, mananatili naman sa gilid nito ang mga ruins ng istrukturang nasira ng lindol.

Ang nasabing century-old na bell tower ay kilala bilang domeless tower ng Asya at isang national cultural treasure.