Watch more in iWantv or TFC.tv

Aarangkada na ang konstruksiyon ng Metro Manila Subway kasunod ng groundbreaking ceremony na idinaos ngayong Miyerkoles.

Nagkakahalagang P350 bilyon ang proyekto na anim na taong nabinbin.

May 15 istasyon ang subway na may habang 36 kilometro mula Valenzuela hanggang Ninoy Aquino International Airport.

Kasama sa mga tatayuan ng istasyon ang Quirino Highway, Tandang Sora, North Avenue, Quezon Avenue, East Avenue, Anonas, Katipunan, Ortigas North, Ortigas South, Kalayaan Avenue, Bonifacio Global City, Lawton East, Lawton West, NAIA Terminal 3 at FTI Taguig.

Nasa 80 kilometro kada oras ang target na bilis ng tren na bibilhin mula Japan kaya aabutin na lang daw ng kalahating oras ang biyahe mula Quezon City hanggang NAIA Terminal 3.

Tatlo sa 15 istasyon ang gagawin bago matapos ang Duterte administration — ang Quirino Station sa may Quirino Highway, Tandang Sora Station, at North Avenue Station malapit sa Veterans Memorial Medical Center.

Ayon kay Metropolitan Manila Development Authority (MMDA) general manager Jojo Garcia, magdudulot ng matinding trapiko ang pagtatayo ng subway.

Magiging mabilis naman daw ang paggawa dahil sa tunnel boring machine na bubutas sa lupa na dadaanan ng subway.

Ang naturang teknolohiya ay mula rin sa Japan na siyang contractor ng gobyerno sa proyekto. -- Ulat ni Jacque Manabat, ABS-CBN News