Hybrid yellow corn inirekomendang itanim sa dry season sa Pangasinan

Joanna D. Tacason, ABS-CBN News

Posted at Feb 15 2019 05:13 PM

Hybrid yellow corn ang nais na ipatanim sa mga magsasaka sa Pangasinan ngayong inaasahang dry spell. Kumpara sa palay, mas matipid ito sa patubig at abono. Joanna D. Tacason, ABS-CBN News


Inirekomenda ng Pangasinan Provincial Agriculture Office sa mga magsasaka ang paggamit ng hybrid yellow corn sa pagtatanim ngayong second cropping season kung saan inaasahan ang epekto ng dry spell.

Nasa 54,000 ektarya ng sakahan ang tinatamnan ng yellow corn lalo na sa mga rain-fed areas tulad ng mga bayan ng Bayambang, Bautista, Alcala, Basista, Malasiqui at San Carlos City.

Mas maganda umano ang ani at kalidad ng produktong mais kung hybrid yellow corn seeds ang gagamitin. 

Kung ikukumpara sa pagtatanim ng palay, mas matipid sa patubig at abono ang mais. Mas mataas din ang kita dahil nasa P11 hanggang P16 ang presyo ng mais kada sako, ayon sa agriculture office. 

Sa ngayon, umaabot sa anim na tonelada kada ektarya ang corn production sa Pangasinan. Itinuturing din na top producer ng mais ang probinsya sa buong bansa.

Kamakailan, nagawaran ng Department of Agriculture ang Pangasinan bilang Hall of Famer sa Corn Quality Award at nabigyan ng P5-milyong premyo na ibibili ng karagdagang hybrid yellow corn seeds na siyang subsidiya sa mga magsasaka.
 

Bisitahin ang Patrol.PH para sa iba pang mga balita.