Bloke-blokeng cocaine narekober sa Dinagat Islands

Maan Macapagal, ABS-CBN News

Posted at Feb 15 2019 09:35 AM

MAYNILA – Nasa 37 bloke ng hinihinalang cocaine ang natagpuan sa dalampasigan ng Purok 2, Barangay Poblacion sa bayan ng Cagdianao sa Dinagat Island kamakailan.

Dinala na ang ilegal na droga sa regional crime laboratory sa Butuan City para masuri.

Ayon sa ulat, Pebrero 12 ng hapon nang ipagbigay-alam sa Cagdianao Municipal Police Station ng isang mangingisda ang natagpuang bloke-bloke ng hinihinalang cocaine sa dalampasigan.
 
Biyernes ng madaling araw naman nakarating ang impormasyon sa Caraga regional police.

Magugunitang isang bloke rin ng cocaine ang nakitang palutang-lutang sa dagat na sakop naman ng bayan ng Vinzons sa Camarines Norte.

Nalaman sa laboratory test na cocaine ito na nagkakahalaga ng P5 milyon.
 
Iniimbestigahan na rin ng awtoridad kung may koneksiyon ang natagpuang cocaine sa Dinagat Island sa drogang nakita sa Camarines Norte.

Bisitahin ang Patrol.PH para sa iba pang mga balita.