Wala nang maibentang bigas galing sa National Food Authority (NFA) ang mga tindero sa palengke ng Tacloban City.

Ito'y sa gitna ng mga ulat mula sa ibang lugar ng kawalan ng buffer stock ng NFA rice.

• NFA sa Palawan, wala nang buffer stock ng bigas

Ayon sa mga NFA rice retailers, hanggang dalawang sako lang ang naibibigay sa kanila kaya madaling nauubos ang bigas na mas mura kaysa sa commercial rice.

Dagdag nila, commercial rice muna ang kanilang itinitinda sa ngayon habang wala pang suplay galing sa NFA.

Tumaas na ang presyo ng commercial rice. Ang regular milled rice ay P42 bawat kilo ang pinakamura habang nasa P45 kada kilo ang presyo ng pinakamurang well-milled rice.

• 'Supply ng NFA rice, pinakamababa na sa 10 taon'

Sa warehouse naman ng NFA sa Tacloban City, mahigit sa 2,000 sako ng bigas na lamang ang natitira.

Patuloy pa itong nababawasan lalo't patuloy na bumibili ang ilang retailers.

Ganito rin ang sitwasyon sa mga palengke sa Palo at Alangalang, Leyte.

Dagdag pa nila, noong nakaraang buwan pa nang simulang limitahan ng NFA ang bigas na maari nilang bilhin.

Sa kabila ng mga ulat ng mababang suplay ng NFA rice, itinanggi ni Department of Agriculture Secretary Emmanuel Piñol na may kakulangan sa bigas.

Aniya, sapat pa ang suplay ng bigas mula sa mga lokal na magsasaka.