DAVAO CITY - Binabantayan na ngayon ng Department of Social Welfare and Development sa Region XI ang umano'y pagsasangla ng cash card ng mga benepisyado ng Pantawid Pamilyang Pilipino Program (4Ps).

Ito ay matapos lumabas sa tala ng opisina na nasa 186 na benepisyado ang ginagawa umanong collateral sa utang ang kanilang cash card.

Isa si Aida Esmael sa mga benepisyado ng 4Ps. Sa 10 taon niyang nakakatanggap ng tulong mula sa pamahalaan, hindi umano niya naisipan na gawing collateral sa utang ang hawak niyang cash card dahil natatakot siyang matanggal sa listahan ng DSWD.

"Sa ngalan kay Allah kahit isang beses hindi ko ito nasangla," aniya.

DSWD XI monitors 168 4Ps beneficiaries in Davao region who allegedly pawned their ATM/cash card. The agency warns against using their cards as a loan collateral that they might be delisted as beneficiary. @ABSCBNNews pic.twitter.com/1VUoz88OLu

— Hernel Tocmo (@HernelTocmo) February 4, 2019

Sa ngayon ay isinailalim sa counselling ang mga benepisyadong nagsangla ng cash card, habang ang iba naman ay sinuspende muna ng dalawang buwan ang matatanggap na benepisyo.

Nagbabala naman ng DSWD na kanilang tatanggalin sa kanilang listahan ang sino mang malaman na isinasanla ang kanilang cash card.

Nagsasagawa ang kanilang social worker ng sorpresang pagbisita sa mga benepisyado bukod sa buwan-buwang Family Development Session.

Ayon kay Florame Mhecai Espada, ang Regional Information Officer ng DSWD XI, para sa pag-aaral at kalusugan ng mga anak ang natatanggap na cash grant kaya may karampatang parusa kung isasangla ang cash card.

May aabot sa 22,496 na benepisyado ng 4Ps sa Davao City na tumatanggap ng halos P5,200 kada dalawang buwan.