Patay ang isang pulis habang 3 ang sugatan nang magkarambola ang 6 na sasakyan sa bayan ng Cabatuan, Isabela noong Martes.

Dinala pa sa ospital si Patrolman Gilbert Aison, miyembro ng Isabela Provincial Mobile Force Company, pero idineklara ring dead on arrival, ayon sa pulisya.

Nagtamo naman ng mga sugat ang 3 kasama ni Aison, kabilang ang kaniyang buntis na misis, kasunod ng insidenteng nangyari sa national highway sa Barangay Magsaysay.

Pumutok ang kaliwang harapang gulong ng kotse ni Aison habang binabaybay niya ang national highway, base sa imbestigasyon ng Cabatuan police.

Tuluyang nawalan ng kontrol ang kotse hanggang sa nasagi ang kasalubong na dump truck at sumalpok sa isang tricycle na nakaparada sa tabing kalsada.

Pumutok din umano ang gulong ng dump truck, na sumalpok naman sa 3 pang nakaparadang sasakyan.

Papunta sanang Santiago City ang pulis para ipa-check up ang kaniyang misis, base sa imbestigasyon.

-- Ulat ni Harris Julio