2 lalaking bumalik sa volcano island ng Taal hindi na mahagilap

ABS-CBN News

Posted at Jan 29 2020 07:07 PM

Watch more in iWantTFC

MAYNILA — Nananawagan sa mga awtoridad ang mga pamilya ng 2 lalaki na umano'y bumalik sa pulo o volcano island ng Bulkang Taal na hindi pa rin mahagilap sa kasalukuyan. 

Kinilala ang mga nawawala na sina Alexander Dando, Jr. at Marlon Deteral, na kapwa mga residente ng Barangay Alas-As, Volcano Island, San Nicolas, Batangas.

Kuwento ni Gerry Dando, kapatid ni Alexander, nakalikas na sila noong pumutok ang Bulkang Taal higit 2 linggo na ang nakalilipas, pero bigla daw bumalik si Alexander sa pag-aakalang tapos na ang pag-aalboroto ng Taal. 

Mula noon ay hindi na makontak si Alexander. 

Aminado si Gerry na nakainom ang kapatid dahil may kasalan sa pulo noong araw na pumutok ang Bulkan Taal.

Nananatiling parte ng permanent danger zone ang volcano island kahit pa ibinaba na sa 3 ang alert level ng Bulkang Taal. 

Ayon naman kay Bernadette Valenzuela, nagpaiwan daw ang kapatid niyang si Deteral sa isla sa pag-aakalang naiwan ang kanilang ina sa bahay nito. Nauna na palang nakalikas ang ina ng magkapatid. 

Mula noon hindi na natagpuan si Valenzuela.

Sabi ni San Nicolas Mayor Lester de Sagun, hindi pa rin makapagsagawa ng search operation sa 2 naiulat na nawawala dahil nasa ilalim pa rin ng lockdown ang volcano island. —Ulat ni Dennis Datu, ABS-CBN News

Bisitahin ang Patrol.PH para sa iba pang mga balita.