DAVAO CITY — Nabaril ng mga pulis ang drug suspek na si John Paul Bueno, matapos umanong manlaban ito habang katransaksyon ang poseur buyer na pulis, sa Fatima Village, Sasa, Davao City nitong Biyernes ng umaga.

Pero giit ng pamilya ng napatay, walang buy-bust na nangyari sa loob ng bahay, kung saan mismo nangyari ang insidente. Nakahiga pa daw ang biktima nang biglang pumasok ang mga pulis sa loob.

Kwento ng kapatid ni John Paul, na nasa kwarto, narinig pa nito ang kuya na nagmamakaawa sa mga pulis bago binaril.

Tinutukan pa umano sila ng armas nang makita ng mga pulis.

“Ana pa sila, ‘naa pa diay tao diri oh. Apil ni, iapil. Ana ko, ‘wala man mi labot Sir.’ Tapos gitutukan mig baril.... Lima ka buto akong nadunggan. Daghan nakadungog. Human, gipagunit nilag baril,” aniya.

(Sabi nila, “meron pang tao dito. Isali natin to. Sabi ko, “di kami kasali, Sir.” Tapos tinutukan kami ng baril... limang putok ang narinig ko. Maraming nakarinig. Tapos pinahawak nila ng baril.)

Nakulong na noong 2015 si Bueno dahil nasangkot rin sa paggamit ng iligal na droga.

Ayon sa pulis, bumunot ng baril ang napatay kaya napilitan ang pulis na magpaputok at nabaril ito.

Nananawagan ng hustisya ang pamilya sa pagkamatay ng kanilang mahal sa buhay.