GENERAL SANTOS CITY – Nilahukan ng mahigit sa 100 fishing boats ang pagdiriwang ng ika-41 Patronal Fiesta ng Sto. Niño de Bula na dinayo rin ng nasa 50,000 mga deboto, Martes ng umaga.

Hindi biro ang gastos sa dalawang oras na fluvial procession sa Sarangani Bay dahil daang libong piso rin ang gastos sa krudo ng bawat fishing boat.

Pero ayon kay Marfenio Tan, chairman ng fluvial procession, ang Sto. Niño de Bula ang patron ng mga mangingisda sa paniniwalang magdadala ito ng suwerte sa kanila sa laot.

"Higit 40-years na ang tradisyon na ito ng mga mangingisda sa GenSan at taun-taon lalo itong lumalakas,” pahayag ni Tan.

Watch more in iWantv or TFC.tv

Sa General Santos, nagbibigay ng trabaho ang fishing industry sector sa higit 100,000 na mga manggagawa. Tinagurian ding tuna capital ng bansa ang lungsod dahil pito sa 9 na canning factories ay matatagpuan dito.

Sa tradisyon ng Sto. Niño de Bula fiesta, isang misa ang ginanap madaling araw ng Martes. Matapos nito ay kinukuha ang itim na poon ng Sto. Niño at isinasakay sa amphibian.

Dinala ito sa Sarangani Bay at inilipat sa mother boat bilang hudyat ng fluvial procession na nagtagal ng higit dalawang oras. Muling ibabalik ang poon sa Parokya na susundan ng fiesta mass.