Mga nagbebenta ng mahal na face mask kakasuhan

ABS-CBN News

Posted at Jan 14 2020 05:54 PM | Updated as of Jan 14 2020 08:41 PM

Watch more in iWant or TFC.tv

Kakasuhan ng Department of Trade and Industry (DTI) ang 7 tindahan sa Maynila dahil sa umano ay pagbebenta ng face mask nang sobrang mahal. 

Bukod sa mga kasong haharapin gaya ng profiteering at pagmanipula ng presyo, irerekomenda rin ng ahensiya sa Manila City Hall na ipasara ang mga tindahan dahil sa pananamantala, ayon kay Trade Undersecretary Ruth Castelo.

Ipinaliwanag ng DTI na ayon sa batas, dapat 10 porsiyento lang ang kita ng mga nagtitinda ng mask kaya kung P65, halimbawa, ang presyo ng supplier, dapat nasa P72 lang ang bentahan.

Pero may mga konsumer na binentahan umano ng face mask sa halagang P150 sa may Bambang sa Maynila.

Iminungkahi na rin ng DTI sa Department of Health na patawan ng suggested retail price ang face mask para mabantayan ang presyo.

Tumaas ang demand para sa face mask, partikular sa N95 mask, bunsod ng pagbuga ng volcanic ash ng bulkang Taal.

Pero nilinaw na ng mga scientist na hindi kailangan ng mga taga-Metro Manila na mag-N95 mask dahil ligtas ang hangin, maliban lang kung sensitibo ang indibiduwal.

Sa halip, prayoridad umanong mabigyan ng N95 mask ang mga nananatili sa mga lugar malapit sa nag-aalborotong bulkan.

-- Ulat ni Alvin Elchico, ABS-CBN News

Bisitahin ang Patrol.PH para sa iba pang mga balita.