MAYNILA - Hawak na ng mga pulis ang 3 lalaking Chinese na inaresto dahil sa panghoholdap at pagtangay ng P2 milyon sa kapwa Chinese sa Paranaque City noong Lunes ng gabi.

Sa ulat ng Southern Police District, biniktima ng mga suspek ang 24-anyos na si Zhang Huai Zhen, isang grocery salesman na nakatira sa Pasay City.

Nakipagkita ang biktima sa mga lalaki dahil sa nakita niyang online ad nila para sa murang exchange rate o palitan ng piso at Chinese yuan.

Watch more in iWantv or TFC.tv

Kuwento ng biktima sa mga pulis, nagsagawa sila ng transaksyon ng 4 na lalaki sa Sta. Ana Street kanto ng Daang Batang sa Bgy. Moonwalk bandang alas-10 ng gabi.

Sa gitna nito, biglang nag-isprey ang isang suspek ng chili spray sa kanyang mata at tinangay ang kanyang bag na naglalaman ng P2-milyong cash.

Nahuli ng mga tanod ng Barangay Moonwalk ang 3 tumakas na lalaki na edad 25, 31, at 32.

Pero nakatakas ang isa dala ang bag at pera.

Nabawi sa mga inaresto ang 2 caliber .45, isang caliber .38 na baril, pati ang ginamit na chili spray.

Bukod sa robbery, nahaharap ang mga suspek sa kasong illegal possession of firearms and ammunition.

Pinaghahanap naman ng pulisya ang kasamahan nilang at-large.