Ilang lugar sa Samar binaha dahil sa pag-ulan

ABS-CBN News

Posted at Jan 10 2021 01:06 PM

Binaha ang ilang lugar sa Jipapad, Eastern Samar nitong Enero 10, 2021. Retrato mula kay Donelle Pajares

Lubog sa baha ang ilang lugar sa Samar Island ngayong Linggo dahil sa walang tigil na pagbuhos ng ulan.

Sa Eastern Samar, binaha ang ilang barangay sa bayan ng Jipapad matapos tumaas ang tubig sa mga ilog madaling araw ng Linggo.

Bukod sa mga bahay, lubog din ang ilang pasilidad ng munisipyo.

Matatandaang huling nakaranas ng matinding pagbaha ang Jipapad noong manalasa ang Bagyong Ambo noong nakaraang taon.

Baha sa Catubig, Northern Samar nitong Enero 10, 2021. Retrato mula kay Jennifer Acdang

Binaha rin ang ilang bahagi ng Catubig sa Northern Samar.

Sa mga retratong kuha ni Jennifer Acdang, makikitang abot hanggang tuhod ang baha sa bayan at pinasok din ang ilang bahay.

Samantala, sa Allen, Northern Samar, isang lane lang ang maaaring magamit ng mga motorista sa kalsada sa Barangay Calarayan matapos matabunan ng lupa ang isa pang lane.

Bunsod din umano ito ng patuloy na pag-ulan sa lalawigan.

Ayon sa lokal na Department of Public Works and Highways, nagsasagawa naman na sila ng clearing operation sa daan.

-- Ulat nina Ranulfo Docdocan at Sharon Evite

FROM THE ARCHIVES:

Watch more in iWantTFC
Bisitahin ang Patrol.PH para sa iba pang mga balita.