STA. MARIA, Davao Occidental - Kinasuhan na ng murder noong Huwebes ang 18-taong gulang na lalaking pumatay umano sa kaniyang dalagitang kapitbahay noong Disyembre 29 sa nasabing bayan.

Ayon sa pulisya, nagtamo ng 23 saksak sa katawan ang biktima.

“Ang akusasyon ng mga tao sa social media na hinalay ang biktima. Pero ayon sa Medical Health Officer na nag-examine, negative ang result, negative sa lacerations at negative sa extragenital injuries,” ayon kay PO1 Mae Mamac, imbestigador ng Sta. Maria Police.

Nagdadalamhati ang pamilya lalo’t marami pa sana silang pangarap para sa biktima.

Nakakulong na ngayon ang suspek na nagsabing nagtanim siya ng galit sa biktima sa pauli-ulit nitong pangungutyang magnanakaw siya ng manok, bagay na nagawa niya noon.

Hindi naman naniniwala ang pamilya ng biktima sa motibo ng pagpatay dahil may gusto raw ang suspek sa dalagita.