PatrolPH

Bata, nagdiwang ng kaarawan sa burol ng pinaslang na ama

ABS-CBN News

Posted at Jan 03 2019 04:44 AM | Updated as of Jan 03 2019 08:39 PM

Watch more on iWantTFC

MAYNILA - Nagdiwang ng kaniyang kaarawan ang isang bata sa burol ng ama na pinaslang 2 araw bago mag-Bagong Taon.

Hindi makuhang maging masaya ng batang si alyas Carlo kahit ipinagdiriwang ang ika-10 taong kaarawan.

Nakaburol kasi ang kaniyang ama na pinaslang sa Mandaluyong City, isang araw bago ang kaniyang kaarawan.

"Kasi po hindi namin expected na ganun mangyayari. Nakaplano na 'yun every New Year’s Eve nagce-celebrate, kaya nahanda na ang cake na ibo-blow niya," ani ng tiya ni Carlo.

Ang tiya ni Carlo ang may-ari ng video na ipinadala sa Bayan Mo, Ipatrol Mo sa pagnanasang makamtan ang hustisya para sa pinatay na kapatid.

Nakahandusay sa kalsada ang ama ni Carlo matapos saksakin ng kainuman nito. Kakabirthday lang din ng biktima noong Disyembre 28.

Pumayag ang tiya at lola ni Carlo na tumatayong guardian sa kaniya na makapanayam ng ABS-CBN News.

Watch more on iWantTFC

Para kay Carlo, masakit ang pangyayari lalo't pakiramdam niya ay mag-isa siya sa panahong ito. 

Kakaalis lang ng kaniyang ina patungong Saudi nitong Oktubre at hindi pinayagan ng amo na makauwi.

"Sinabi sa akin ng mama, isipin ko lang daw po nasa tabi ko siya," aniya.

Nangako siyang mag-aaral ng mabuti para sa namayapang ama.

"Maging pulis po para mahuli ang nang-ano sa papa ko," aniya.

Pinaghahanap na ng mga pulis ang taong sinasabing pumaslang sa biktima. - ulat ni Ernie Manio, ABS-CBN News

Bisitahin ang Patrol.PH para sa iba pang mga balita.