Watch more in iWantv or TFC.tv

Masarap kumain ng mainit na sabaw kapag malamig ang panahon.

Kaya naman maaari mong subukang magluto ng almondigas, o mas kilala bilang misua with meatballs para mapainit ang iyong sikmura.

Sa "Umagang Kay Ganda" nitong Martes, ibinahagi ng guest kusinero na si Marlon Aquino kung paano lutuin ang almondigas.

Ihanda lamang ang mga sumusunod na sangkap:

• Misua
• Patola
• Mantika
• Sibuyas
• Itlog
• Harina
• Bawang
• Dahon Ng Sibuyas
• Patis
• Tubig
• Giniling na baboy

Paraan ng pagluluto:

Sa isang lalagyan, pagsama-samahin ang giniling na baboy, harina, itlog, sibuyas, dahon ng sibuyas, paminta at asin. Haluin.

Gumawa ng bola-bola, ayon sa gustong laki. Itabi.

Sa mainit na kawali, igisa ang bawang at sibuyas.

Ilagay ang tubig at ihalo ang meatballs habang hindi pa kumukulo para hindi ito maghiwa-hiwalay.

Ilagay ang patola, misua at pakuluan hanggang maluto.

Maaari nang ihanda ang almondigas.