MANILA -- Mula sa kanyang hilig sa paggawa ng cupcakes at cookies, nagtayo ang aktres na si Ara Mina ng kanyang sariling cafe sa Holy Spirit Drive sa Don Antonio Heights, Quezon City.

Ipinasilip ni Ara sa "Umagang Kay Ganda" nitong Huwebes ang kanyang restawran na Hazelberry.

"Kasi noong 2013 ay nagbe-bake na ako. Tapos tumatanggap ako ng orders ng cupcakes, ng cookies, sumasali ako ng bazaar. So I decided na magtayo ako ng bakeshop, ng cafe," ani Ara.

Ayon kay Ara, hango sa kanyang pangalan at nickname na ginamit noon ang pangalan ng kanyang cafe.

"Sa mga hindi po nakakaalam, ang totoo ko pong pangalan ay Hazel. Tapos noong nagkaroon ako ng Blackberry phone, 'yung may BBM, ang pangalan ko doon ay Hazelberry. Kaya noong nag-start akong mag-bake, naisip kong bakit hindi ko gamitin ang pangalan na ginamit ko noon," paliwanag ni Ara.