Paghahanda ang pinakamainam na sandata para makaiwas sa peligro ngayong panahon ng tag-ulan.

Sa programang 'Red Alert', ibinigay ang ilang paghahanda na maaaring gawin upang masiguro ang kaligtasan. 

Makatutulong na ugaliing maging updated sa ulat-panahon sa pamamagitan ng TV, radio at internet. 

Dapat ding alamin kung madalas bahain ang inyong lugar para mapag-usapan ng pamilya ang gagawing paglikas sakaling magkaroon ng bagyo.

Bago tumama ang bagyo, mainam na suriin kung may kailangang ayusin o kumpunihin sa inyong tahanan. Ipuwesto sa matataas na parte ng bahay ang appliances para hindi masira ng tubig-baha. Takpan din ang saksakan o outlet para hindi abutin ng tubig.

Mainam din ang paghahanda ng emergency go-bag na maaaring dalhin sakaling kailangang lumikas o mawalan ng kuryente sa kalagitnaan ng bagyo. 

Narito ang listahan ng mga nilalaman ng isang go-bag:

• Pagkain na de lata at may easy open tab
• Tubig
• Signaling kit (flashlight na may baterya, at pito)
• Kandila
• Hygiene kit (sabon, toothpaste, shampoo, etc.)
• Importanteng dokumento tulad ng birth certificate, ID at iba pa na ilalagay sa isang waterproof na lalagyan
• Powerbank
• Battery-powered radio

Ipuwesto lang ang go-bag sa isang lugar na madaling kuhanin sakaling kailangang lumikas nang mabilisan.

Para sa karagdagang tips, sundan ang Red Alert sa Facebook page (www.facebook.com/RedAlertABSCBN) at Twitter account (@abscbnredalert).