Watch more in iWantv or TFC.tv

Hindi karaniwang naririnig ang pagpapari ng mga pamilyadong lalaki.

Kaya para sa 66 anyos na si Fr. Lamberto Ramos, naging mahirap sa umpisa ang muling pagtahak sa landas ng paglilingkod sa simbahan.

Aniya, ang huling habilin ng kaniyang asawa bago ito mawala ang tuluyang nakapag-udyok sa kaniya na balikan ang interes sa pagpapari.

"You couldn't think of any other experience worse than a loved one dying on your own hands," ani Ramos.

"She was dying...she said, 'Lambert, if you become a priest, that is the only wealth that I wish'," dagdag ni Ramos, patungkol sa kaniyang yumaong asawa.

Sa loob ng 2 taon mula nang mawala ang kaniyang misis, hindi aniya sumagi sa kaniyang isip na muling mag-asawa.

"Getting married again is not something I wanted to do but perhaps I can go back to what I used to do," anang pari.

Bago mag-asawa, pumasok na sa seminaryo si Ramos at nag-aral ng Philosophy.

Lumabas siya sa seminaryo dahil sa habilin ng mga pari na subukan ang buhay sa labas bilang parte ng regency o probation period.

Habang nasa labas ay nagturo si Ramos ng pilosopiya sa College of Holy Spirit at dito niya natagpuan ang naging misis.

Napagdesisyunan niyang hindi na bumalik sa seminaryo at bumuo na ng pamilya kasama ang kaniyang asawa.

Nag-aral si Ramos ng dagdag na kurso at piniling magtrabaho. Kalauna'y naging pangulo pa ito ng iba't ibang kompanya.

Batid rin ni Ramos ang pagbabago sa kaniyang pamumuhay ngayon na naglilingkod na siya sa simabahan.

"Having been president, I was so used to barking orders. Suddenly as a new priest, I was made to promise--five times during my diaconate and five times during my priest ordination--obedience to bishops," ani Ramos.

Dagdag ng pari, suportado ng kaniyang tatlong anak ang desisyon niyang magsilbi sa Simbahang Katolika.

"They look at it as if this is a fulfillment of their mother's wish," ani Ramos.