PatrolPH

Dine-in sa mga kainan puwede na ulit simula Lunes

Abner Mercado, ABS-CBN News

Posted at Jun 14 2020 06:53 PM

Watch more News on iWantTFC

Tatlong buwan nang sarado ang restaurant ng chef na si Tatung Sarthou sa Tomas Morato, Quezon City matapos mag-lockdown ang ilang bahagi ng bansa para makontrol ang pagkalat ng COVID-19.

Simula Lunes, sa pahintulot ng gobyerno, maaari nang magbukas at tumanggap ng mga dine-in customer ang mga restaurant at fast food establishment.

Pero nag-aalinlangan si Sarthou at kailangan muna raw niyang timbangin ang takbo ng negosyo.

Inihahanda na rin ni Sarthou ang magiging ayos ng kanilang restaurant alinsunod sa panuntunan ng Inter-Agency Task Force on Emerging Infectious Diseases.

Magandang balita naman umano para kay Rustica Alano na maaari nang tumanggap ng dine-in customers ang kaniyang karinderya sa Quezon City.

Naglagay na siya ng marka sa mga upuan para malimita ang uupuan ng mga kakain.

"Malaking bagay talaga... kasi kahit papaano mas marami nang makakapasok at kumain sa amin, 'di gaya ng dati na take-out lang," ani Alano.

"Dapat mayroon kaming alcohol at hand sanitzer para kahit paano sigurado kami na ligtas pa din kami sa virus," ani Alano.

Simula Hunyo 15, bibigyan naman ng Department of Tourism (DOT) ng pahintulot ang mga restaurant sa mga hotel na tumanggap ng dine-in customers pero hanggang 30 porsiyento seating capacity lamang.

Dapat din masunod ang social distancing at iba pang safety protocol sa mga restaurant ng mga hotel.

Kailangan lang umano ng mga hotel na mag-apply ng accreditation sa DOT.

Tiwala umano si Tourism Secretary Bernadette Romulo-Puyat na makababawi din ang industriya mula sa pagkalugi sa pamamagitan ng sama-samang pagkilos para matiyak ang kalusugan at kaligtasan ng mga empleyado at mga kostumer.

-- Ulat ni Abner Mercado, ABS-CBN News

Bisitahin ang Patrol.PH para sa iba pang mga balita.