Watch more in iWantv or TFC.tv

Kapag may outing sa beach o resort, isa sa mga dapat pagplanuhang mabuti ay ang babauning mga pagkain.

Kung sawa na sa mga madalas na baon tuwing may outing, puwedeng subukan ang kakaibang dish na bistek boneless bangus.

Itinuro ng guest kusinero na si Chef Paolo Rimando sa programang "Umagang Kay Ganda" kung paano lutuin ang naturang dish.

Si Chef Rimando ay kasosyo ni Chef Tatung Sarthou sa isang restaurant sa beach front ng San Juan, La Union.

Ihanda ang mga sumusunod na sangkap para sa pritong bangus:

• Boneless bangus
• 1/2 tasa ng cornstarch
• 1 tasa ng cooking oil
• Asin
• Paminta

Siguraduhing mainit ang mantika sa kawaling pagpi-prituhan.

Timplahan ng asin at paminta ang bangus.

Lagyan ng cornstarch ang bangus at saka iprito hanggang maging golden brown. Itabi muna.

Narito ang mga sangkap na kailangan para sa sarsa:

• 2 kutsara ng butter
• 4 butil ng bawang
• Sibuyas
• 3 kutsara ng oyster sauce
• 4 piraso ng kalamansi
• Paminta
• Cornstarch
• Tubig

Tunawin ang butter sa kawali.

Isangkutsa ang bawang at sibuyas.

Lagyan ng tubig at hayaang kumulo.

Isunod ang oyster sauce, kalamansi, at paminta bago ihalo ang slurry (cornstarch at tubig).

Ilagay sa ibabaw ng bangus ang sarsa. Lagyan ng hiniwang sibuyas sa ibabaw.