Dinadagsa ngayon ng mga turista ang maliit na barangay ng Caloco sa bayan ng Tinambac, Camarines Sur dahil sa isang beach na naging viral sa social media.

Marami ang nagpakita ng interes na pumunta sa Caloco Beach nang mag-post si Jen Jornales Jimenez sa Facebook ng outing nilang pamilya at magkakaibigan sa lugar na ito.

Dahil hindi pa kilala noon ang Caloco, solo nila ang dagat.

Nag-trending ang kaniyang post na mayroon nang 6,500 likes at mahigit 3,000 shares.

Siguradong babalik-balikan ng mga turista ang pino at maputing buhangin ng beach at kulay berde't asul na tubig ng dagat.

Kung may sariling sasakyan, mahigit isang oras ang biyahe mula sa Naga City papuntang Caloco Beach.

Para naman sa mga backpackers, pwedeng mag-jeep mula Naga at sumakay ng habal-habal pagdating sa Poblacion ng Yinambac na aabutin ng mahigit dalawang oras.

Pagdating sa paaralan ng barangay, maglalakad lang ng 10 minuto papunta sa dagat.

Kung high tide, pwedeng magbangka o kaya naman maglakad sa lumang footbridge. Pero kung low tide, pwede nang lakarin ang tubig.

Malaki ang potensyal ng Caloco Beach bilang bagong tourist destination ng Tinambac.

Dalawampung taon na nang ideklara ito bilang parte ng Agayayan-Caloco Marine Sanctuary.

Isa sa mga mahihirap na barangay ang Caloco sa Tinambac kaya malaking tulong sa kabuhayan ng mga nakatira rito ang pagdagsa ng mga bakasyunista.

Malawak pa ang plano para sa Caloco. Ilan sa mga posibleng ilagay na beach activities dito ang snorkeling, diving at kayaking.

Pakiusap lang ng lokal na pamahalaan sa mga pupuntang bakasyunista rito, maging responsable para mapanatili ang ganda at kalinisan ng lugar.