Dahil sa naising mapasaya at mapangiti ang iba sa gitna ng hamon na hinaharap sa laban kontra COVID-19, isang flower shop owner ang personal na nagdeliver sa mga frontliners ng mga na-harvest na bulaklak sa Bacolod City.

Maaga pang nag-harvest ng kanyang mga itinanim na mga bulaklak si Pau Lopez, at binisita ang mga ospital sa Bacolod City nitong Biyernes.

Umani siya ng mga ngiti mula sa mga medical workers at iba pang mga frontliners sa Corazon Locsin Montelibano Memorial Regional Hospital at pati na rin sa mga private hospital.

Sinorpresa ni Lopez ang mga medical health workers at frontliner ng kanyang roses at sunflowers at iba pang mga bulaklak.

Sa litratong kanyang ibinahagi sa ABS-CBN, may mga ngiti ang mga healthcare workers at hospital staff kasama na ang mga security guard, utility, driver at receptionist ng mga ospital bitbit ang mga long stemmed roses, sunflowers, million flowers, baby's breath, at chrysanthemum na bigay ni Lopez.

May bulaklak din pati mga nagbabantay sa mga check-up points.

Sabi ni Lopez, paraan daw niya ito na magpahiwatig ng pasasalamat sa mga frontliners at pagkilala sa sakripisyo nila laban sa COVID-19.