Dating nurse umasenso sa negosyong gluta

ABS-CBN News

Posted at Feb 28 2019 03:52 PM

Watch more in iWant or TFC.tv

Isang cum laude graduate ng kursong nursing si Leo Ortiz pero hindi niya inakala na magiging mahirap ang buhay nang siya ay magtapos ng pag-aaral. 

"Sobrang saya po ng feeling after graduation. [Pero] after po hindi po naging madali kasi akala ko may work agad kasi nga honor," kuwento ni Ortiz sa programang "My Puhunan."

Naging volunteer nurse si Ortiz sa isang pagamutan sa pag-asang ma-absorb siya kalaunan, pero hindi iyon ang nangyari. 

"Dapat daw may kakilala ata," sabi niya.

Pero para sa ina, pumasok si Ortiz sa isang call center para lang kumita. 

"Medyo nalungkot po nung una kasi nursing ako tapos wala ako sa ospital, parang profession ba talaga 'to," tanong niya noon sa sarili.

Sinubukan din niya ang pagbebenta ng sari-saring produkto sa pamamagitan ng networking, kung saan inamin niyang nahihiya siya sa tuwing makikita ang kaniyang mga kasabayan. 

"Na-discourage po ako. Pero kung susuko ako at hindi ko tatatagan ang loob ko, wala po. So laban lang po," aniya.

Hanggang isang araw ay naisip niyang pasukin ang negosyong pampaputi ng balat na gluta, na noo'y nauuso sa mga artista. 

"Usong-uso po noon 'yung gluta capsules at injectibles. Ako po 'yung nag-iinject ng gluta IV tutal ako naman ay registered nurse at may license."

Doon na simulang naka-ipon si Ortiz hanggang sa makapagtayo siya ng sariling aesthetic center at nakapag-develop pa ng sariling food supplement at inumin. 

"Nakita ko po kasi ang mga Pinoy mahilig sa medyo unhealthy food po," paliwang ni Ortiz. 

Sa ngayon, nakaraos na sa buhay si Ortiz at naibibigay na niya ang gusto ng kaniyang pamilya, lalo na ang mga hiling ng ina tulad ng pagta-travel at shopping. 

"Kailangan po talaga desidido, pursigido, tsaka masipag," payo ni Ortiz sa mga nais magnegosyo. 

Bisitahin ang Patrol.PH para sa iba pang mga balita.