Paano makitungo sa tsismosong kapitbahay?

ABS-CBN News

Posted at Jan 24 2018 05:40 PM | Updated as of Jul 18 2019 03:46 PM

Watch more in iWantTFC

Isa ang tsismis sa mga karaniwang pinag-uugatan ng mga hindi pagkakasundo sa pagitan ng magkakapitbahay.

Tinalakay ng sociologist na si Gerald Abergos sa programang "Sakto" ng DZMM ang wastong pagtugon sa mga kapitbahay na mahilig magkalat ng mga kuwentong naglalaman ng hindi kumpirmadong impormasyon.

Ayon kay Abergos, nagiging paksa ng tsismis ang isang tao dahil hindi ito nakikitaan ng iba ng mga katangiang angkop para bigyan ng respeto.

"Kaya ka natsi-tsismis kasi they haven’t seen you in a level na you are a person of higher value," paliwanag ni Abergos. 

Bagaman dapat ay likas umano ang paggalang sa iba, may mga pagkakataong dapat umanong ipakita ng isang tao sa iba na siya ay nararapat na bigyan ng respeto.

"There are things that you have to do to show them na you don't deserve that (tsismis), na kagalang-galang ka," aniya.

Payo ni Abergos, huwag hayaan ang mga tsismoso at sa halip ay mahinahong harapin ang mga ito.

Kahit itanggi ng pasimuno ng tsismis ang kaniyang nagawa, may mensahe pa ring hatid ang pagkausap sa kaniya.

"The tsimoso o tsismosa will see you as a person of high value, that you can confront them," paliwanag ni Abergos. "Medyo may konting pitik sa kaniyang damdamin, may konting saway, takot na."

Bisitahin ang Patrol.PH para sa iba pang mga balita.