Nasa ilalim na ng restrictive custody ang mga pulis na sangkot sa pagkamatay nina Carl Angelo Arnaiz at Kian Delos Santos--isa umanong "disciplinary measure" habang iniimbestigahan ang mga ito.

Ngunit ano nga ba ang ibig sabihin ng restrictive custody para sa kapulisan?

• Cops involved in Arnaiz case placed under restrictive custody

Ayon kay Kabalikat ng Mamamayan (Kabayan) Party-list Rep. Harry Roque, ang pagsailalim sa restrictive custody ng mga pulis na iniimbestigahan ay nakapaloob sa Republic Act (RA) 8551 o "Philippine National Police Reform and Reorganization Act of 1998."

"Ang ibig sabihin ‘non (restrictive custody), hindi ka makakalabas ng kampo (Camp Crame)," ani Roque sa isang panayam sa DZMM.

Sa ilalim ng restrictive custody, hindi ikinukulong sa selda ang isang pulis, subalit hindi rin siya makalalabas ng Kampo Crame, ang punong-tanggapan ng Philippine National Police (PNP).

Inihalintulad ito ni Roque sa "house arrest."

"I suppose sa loob ng kampo puwede naman siya gumala-gala dahil hindi naman siya nakalagay sa preso," ani Roque.

Wala aniyang posisyon o trabahong hahawakan ang isang pulis sa ilalim ng restrictive custody.

Matatandaang naging isyu ang balita na tinanggal umano sa restrictive custody ang mga pulis na dawit sa pagpatay kay Albuera Mayor Rolando Espinosa Sr. noong Disyembre.

Nilinaw ng PNP na pinauwi lamang ng Leyte ang mga pulis upang kumuha ng mga dokumento para sa kanilang counter-affidavits, kasama aniya ang iba pang mga tauhan ng PNP.

• Cops involved in Espinosa raid still under restrictive custody: PNP

Paliwanag ni Roque, sa pagkakataong lalabas ang mga pulis sa kampo, kinakailangan samahan sila ng mga bantay.

Kabilang ang mga pulis na may kinalaman umano sa ilegal na bentahan ng droga sa mga pinatawan ng police custody noong nakaraang taon.

• Mga pulis na dawit sa droga, isinailalim sa restrictive custody