Screengrab from Karen Davila YT

MAYNILA  -- Emosyonal na ibinahagi ng dating komedyante na si Bearwin Meily ang madilim na pinagdaanan niya sa kaniyang buhay.

Sa panayam ni Karen Davila sa kaniyang vlog, binalikan ni Meily ang kaniyang maagang pagkalulong niya sa bisyo gaya ng drugs, sugal at pambabae.

Ayon kay Meily, bunga ng magulong pamilya na kaniyang pinagmulan, maaga din siyang namulat sa mga ‘di magagandang gawain.

“Magulo, sobrang gulo, 11 kaming magkakapatid, iba-iba ang nanay namin. That’s father side, apat ‘yung nanay namin,” kuwento ng komedyante kay Davila.

“Apat ‘yun. Sa pangatlong asawa, isa lang ako, so doon struggle ako, ‘yung pagiging fair ng magkakapatid sa family ‘yung iba tatlo, iyung iba lima, ako isa lang. Ang mommy ko, nagkaroon ng tatlong asawa. So mayroon din akong mga kapatid doon apat,” pagbabahagi pa niya.

Kung ilalarawan aniya ang kaniyang buhay, hindi aniya ito naging madali para sa komedyante.

“Ang life ko, hindi siya parang basketball na dini-drible lang. Para siyang tennis punta ako doon, punta ako dito, so kung saan-saan ako binabato ng mundo,” ani Meily.

Mula sa pagkakalulong sa mga hindi magandang gawain, nagsimula si Meily na mabigyan ng break sa show business na masasabi rin niyang naging daan para ipagpatuloy pa niya ang mga bisyo. Pero sa kalaunan ay unti-unti na niyang nakikilala ang Panginoon.

“I think 20 years na, mas marami ‘yung naging project ko.. After n’on nagka-sense na ako na ako na hanggang saan ba ako? Kasi 20 years na ako sa industry ang then my dad was suffering from emphysema, so pinakita sa akin ni God na, ‘Hey lahat may hangganan, saan ka?’ Si Lord ang nagpakita sa akin no'n. Kaya sabi ko ‘ayoko na nga,” kuwento nito.

Isa rin sa naging daan para tuluyan ni Meily na iayos ang kaniyang buhay ay ang pagkamatay ng kaniyang ama noong 2008.

Hindi man naging madali para sa komedyante ang mga pinagdaanan, naniwala si Meily sa kaniyang pananalig na naging daan naman ngayon para ituloy niya ang kaniyang pangalawang buhay bilang isang aktibong pastor.

“Siguro mahirap maintindihan lahat, pero pinayagan ni Lord lahat e. It's about pain, challenges, trials, problems, obtacles. Pinayagan niya, masakit lahat ‘yun. But, finish line you have to share your stories... and you will cross the finish with the Lord. Nabubuhay pa ako ngayon dahil I just want to share His story. His story, it’s not mine anymore. I’m done, lahat tayo matatapos. So this is more than second chance,” pahayag pa niya.