MAYNILA - Lesbian movie project. Ito ang mabilis na naisip ng blockbuster movie director na si Sigrid Andrea Bernardo ng tanungin kung ano ang tingin niyang magandang proyekto para kay Nadine Lustre at Kathryn Bernardo.

Matatandaan na kamakailan lang, naging mainit ang panawagan ng netizens at fans ng dalawang award winning actress na magsama sila sa isang pelikula matapos mag-krus ang kanilang landas sa isang party. 

View this post on Instagram

A post shared by Aivee Aguilar Teo (@draivee)

"A lesbian movie, puwedeng 'T-Bird At Ako', but I would loved to direct them in a lesbian movie a mature lesbian movie," bungad ni Bernardo sa naging panayam sa entertainment press. 

Isa rin sa maugong na panawagan ng maraming fans ni Kathryn at Nadine ay ang ang remake ng 1982 movie na "T-Bird At Ako" na isa sa pinagsamahang pelikula nina Vilma Santos at Nora Aunor pero para sa direktor, mas mature na kuwento ang dapat gawin ng dalawang mahusay na aktres ngayon.

"Nahuhusayan ako sa dalawa and alam mo 'yun ang tagal ko nang hindi gumagawa ng lesbian movie 'di ba ang last ko pa is with Teri [Malvar] but it was coming of age and then 'yung 'LuLu' ko naman is a series, So ito, I really want to do a film na matured naman. Nasa right age sila, about relationship those struggles of being in a relationship," paliwanag ng direktor.

Naniniwala rin si Bernardo na handa na rin ang mga fans ni Kathryn at Nadine kung sakaling matutuloy ang pagsasama ng dalawang bigating aktres sa isang Girl Love movie project. 

"It's about time. I mean nasa right time na tayo na ang lahat ng tao is pa-woke na 'di ba? So this is the right time tingin ko na gumawa. Kasi that time noong nag 'Cha-Cha' [Ang hulig Cha-Cha Ni Anita] ako nag start pa lang noon e', ngayon parang may 'GL' series may 'BL' series na rin naman." 

Si Bernardo ang direktor sa likod ng mga pinag-usapang LGBTQIA+ movie na "Ang Huling Cha-Cha Ni Anita" at "Lulu".