MAYNILA - “I doubt that's gonna happen, man!” 

Ito ang diretsong sagot ng aktor na si Albie Casiño sa naging panayam ng ABS-CBN News sa usapin ng tila mainit na panawagan ng netizens sa balik-tambalan nila ng kaniyang dating ka love team na si Kathryn Bernardo.

Matatandaan na isa ang aktor sa mga naiisip ng netizens sa posibleng muling makapareha ni Bernardo matapos ang naging hiwalayan ng KathNiel love team. 

Pero para kay Casiño, imposible ng mangyari ito lalo pa at magkaiba na sila ng management team ng dating onscreen partner.

“Let’s end that now, especially I’m no longer an ABS-CBN artist. So I don’t feel like it’s gonna happen,” ani ng aktor. 

Ayon pa kay Casiño, alam niya na marami pa rin ang taga-suporta ng tandem nila ni Bernardo na tila umaasa sa posible nilang pagsasama muli sa isang proyekto.

“I find it weird. At first. But right now, I barely see it,” aniya.

Pero kung may pagkakataon, para sa aktor, nakikita niyang magandang proyekto ito kung papalarin na magkasama silang muli. 

“Why would I say no? Parang I don’t say no to work in general so why would I say no to ‘di ba?" aniya.

Taong 2010 at 2011 ng mabuo ang tandem ni Casiño at Bernardo na tinawag noon bilang KathBie na nagsimula sa re-make ng hit ABS-CBN series na “Mara Clara."

Sa ngayon, tinututukan ng aktor ang kaniyang sexy-horror film sa Vivamax na “Ekis” at sa tumitinding mga eksena sa Kapamilya series na “Can’t Buy Me Love” bilang si Charleston Young Tiu.