Watch more in iWantv or TFC.tv

MAYNILA — Bago pa man matapos ang taon, nagkaroon muli ng bagong pagkakataon si Angel Locsin para makapaglingkod.

Ito'y matapos siyang italaga bilang ambassador para sa anti-piracy campaign ng Optical Media Board.

"Hindi ko iniisip na parang ako lang. Para sa akin tayong lahat ambassador nito kasi ito 'yung industriyang bumubuhay sa mga pamilya natin," anang aktres.

Maging si Locsin, naging biktima ng pamimirata sa kaniyang mga naging pelikula, kaya naman matindi ang pagsuporta niya sa bagong tungkulin.

"Simula nung pumasok ako sa industriya, talagang talamak na 'yung pamimirata... Marami akong nakitang producers na umiiyak at nararamdaman ko na paliit nang paliit talaga 'yung movie industry."

Bukod naman sa ilang charity works at projects, tututok na muna si Locsin sa wedding preparations niya sa susunod na taon.

—Ulat ni Ganiel Krishnan, ABS-CBN News