Watch more in iWantv or TFC.tv

MAYNILA — Nakakuha ng suporta ang ABS-CBN sa iba't ibang panig ng mundo matapos nitong ibida ang isang orihinal na Pinoy talent reality competition show sa Cannes, France kamakailan.

Ito ang "Your Moment," ang 2-in-1 sing and dance competition na handog ng ABS-CBN sa global entertainment market.

Sa kompetisyon, dingding lang ang pagitan ng sabayang tagisan ng galing sa pagkanta at pagsasayaw ng duo man o grupo.

"Sa kauna-unahang pagkakataon, beyond borders na ang datingan ng ABS-CBN dahil original at sariling konsepto ang alok nito sa buong mundo," pagmamalaki ni Laurenti Dyogi, head ng TV Production ng ABS-CBN.

Ibinida ng ABS-CBN ang "Your Moment" sa MIPCOM sa Cannes, ang pinakamalaking pagtitipon ng mga entertainment content providers sa buong mundo.
'
Dito nabubuo ang partnership tulad ng sa ABS-CBN at Fritz Productions, isang Dutch company para isulong ang breakthrough show na "Your Moment."

"Simple lang ang mechanics. Kapag pumalo nang bongga ang metro mo, garantisado na ang panalo at dito hindi chair ang nagte-turn kundi 'yung buong high-tech na stage ang iikot," sabi ni Dyogi.

Bukod kay Boy Abunda, hurado rin si Nadine Lustre at Billy Crawford.

Sina Luis Manzano at Vhong Navarro naman ang tatayong host.

—Ulat ni Marc Logan, ABS-CBN News