'Ayan hinimatay na': Jane de Leon natulala sa anunsiyong siya si 'Darna'

ABS-CBN News

Posted at Jul 18 2019 08:47 PM | Updated as of Jul 18 2019 09:04 PM

Watch more in iWant or TFC.tv

Hindi makapagsalita at halos hindi makatayo sa kaniyang kinauupuan ang aktres na si Jane de Leon matapos ianunsiyo ng ABS-CBN executives na siya ang napiling gumanap bilang Darna ng bagong henerasyon.

Sa video na kuha noong Hunyo 15, inakala pa ni De Leon na callback lamang ang meeting na kaniyang pinuntahan kasama ang sari-saring ehekutibo ng network at ng Darna director na si Jerrold Tarog.

Tanong ni ABS-CBN Films managing director Olivia Lamasan kay De Leon: "Are you ready for the responsibility, Jane? Tinatanggap mo na ba ang bato?"

Matapos nito, kitang natulala ang dalaga at hindi muna makapagsalita.

"Wait lang po... Yes po. Oh my God," sabi ni De Leon.

Makikitang napayuko si De Leon nang ilang segundo dahilan para biruin ni Tarog na hinimatay na ang aktres.

"Ayan hinimatay na... Sige compose yourself," sabi ng direktor.

Sabi naman ni ABS-CBN President and CEO Carlo Katigbak, tiwala siyang magagampanan ni De Leon ang iconic role.

"Congrats, kayang kaya mo 'yan," sabi ni Katigbak.

Sa halos 300 nag-audition, si De Leon ang napiling bagong Darna kapalit ng mga aktres na sina Angel Locsin at Liza Soberano.

—Ulat ni MJ Felipe, ABS-CBN News

Bisitahin ang Patrol.PH para sa iba pang mga balita.