MAYNILA -- Ipinakilala na si Coco Martin bilang Tanggol sa ikalawang episode ng "FPJ's Batang Quiapo" nitong Martes.

Sa kanyang unang salang, ninakawan ni Tanggol ang isang babae ng mga alahas at ipinakita ang kanyang angas sa pagtakas sa mga pulis.

"Sa mundong masalimuot, tulad ng Quiapo, pakikibaka sa buhay ang kailangang harapin sa araw-araw para ika'y mabuhay," ani Tanggol.

"Kailangan matuto kang dumiskarte at hindi magpapaapi. Kailangan maging magulang ka at hindi magpapaisa kaya hindi mo na iisipin ang iba para lang mabuhay ka."

Nang umakyat sa isang bahay, akala ng mga pulis ay mahuhuli na nila ang snatcher pero lumabas si Ama (Rez Cortez) kasama ang isang grupo ng mga Muslim na may mga baril din.

Binigyan ni Fatima (Sarah Edwards) si Tanggol ng bagong damit at may mga pangaral naman si Ama sa lalaki: "Ang mabuti, tumutulong ka sa kapwa mo. Muslim man o Kristiyano."

Dinala nila ang alahas kay Lucio (Ronnie Lazaro) pero naisahan sila nito at nabenta lamang ng P2,000.

Mapapanood ang "FPJ's Batang Quiapo" mula Lunes hanggang Biyernes, 8 p.m. sa Kapamilya Channel, Kapamilya Online Live, Cinemo, A2Z, TV5, iWantTFC at TFC.

RELATED VIDEO:

Watch more News on iWantTFC