Bata, patay matapos mapasok sa kalderong may kumukulong sabaw sa Iloilo

Patay ang 2-taong-gulang na batang lalaki matapos aksidente umanong mapasok sa loob ng kalderong may kumukulong sabaw ng batchoy sa Barangay Pantalan, Carles, Iloilo.

Sa imbestigasyon ng Carles police, naglalaro umano ang bata bago ang insidente noong nakaraang Huwebes, Agosto 8. 

Inilapag pagsamantala ng ina ng bata ang kaldero sa lupa dahil may iba pa itong lulutuing pagkain. 

Pero hindi umano namalayan ng ginang na napunta malapit sa malaking kaldero ang kanyang anak at aksidenteng mapasok dito.

Kaagad na dinala sa ospital ang biktima matapos magtamo ng fourth degree burn sa halos buong katawan dahil sa kumukulong sabaw.

Makalipas ang ilang araw, namatay ang bata habang ginagamot sa ospital.