TACURONG CITY, Sultan Kudarat - Pinagkakaguluhan ngayon ng mga residente ng Barangay Calian ang isang biik na may kakaibang itsura.

Alas-10 ng umaga ng Huwebes nang magsimulang manganak ang inahing baboy ni Adelita Dalipe. Normal umanong ipinanganak ang unang pitong biik. Pero nang lumabas ang ika-walong biik, nagulat na lamang siya dahil hindi pangkaraniwan ang itsura nito.

Ang biik ay may dalawang ulo, dalawang nguso at tatlong mata.

Ayon kay Dalipe, feeds lang ang kanyang ipinapakain sa inahin kaya nagtaka siya kung bakit ganito ang itsura ng isang biik.

Paliwanag ng veterinarian na si Allan Alimajen Jr, may kondisyong polycephaly ang biik kung saan nagdikit ang sperm at hindi naghiwalay kaya hindi nabuo ang isa pang biik sa halip naging isa ito.

Karaniwan din umano ang ganitong kondisyon sa ilang livestock animals at maging sa mga tao.

Pero kadalasan hindi umano nagtatagal ang may ganitong kondisyon.

Hanggang ngayon ay buhay pa ang biik at aktibong kumilos pero hindi lang ito nakapaglalakad ng maayos dahil sa bigat ng kaniyang ulo.

Hiniwalay rin ito ng may-ari sa ibang biik para hindi madaganan.

Tinuturing namang biyaya ng pamilya Dalipe ang biik na pinangalanan nilang Mara-Clara.

Sa ngayon, wala silang balak ibenta ang biik.