(UPDATED) Muling magkakaroon ng pagtaas sa presyo ng produktong petrolyo ngayong linggo, ayon sa mga kompanya ng langis.

Base sa abiso ng mga kompanya, epektibo sa Martes, Setyembre 12, ang mga sumusunod na price adjustment:

Caltex (Alas-12:01 ng hatinggabi)
GASOLINA +P0.20/L
DIESEL +P0.40/L
KEROSENE +P0.20/L

Shell, Seaoil, Flying V, Petron (alas-6 ng umaga)
GASOLINA +P0.20/L
DIESEL +P0.40/L
KEROSENE +P0.20/L

Petro Gazz, Jetti Petroleum, Unioil, PTT Philippines, Phoenix Petroleum (alas-6 ng umaga)
GASOLINA +P0.20/L
DIESEL +P0.40/L

Cleanfuel (alas-4:01 ng hapon)
GASOLINA +P0.20/L
DIESEL +P0.40/L

Watch more News on iWantTFC

Ito na ang ika-10 sunod na linggong nagkaroon ng pagtaas sa presyo ng produktong petrolyo.

"Dahil po doon sa announcement na ginawa ng Saudi Arabia at Russia na 'yong kanilang voluntary cut [sa oil supply] ay e-extend... alam naman natin na pataas ang demand because of the winter season," paliwanag ni Oil Industry Management Bureau Assistant Director Rodela Romero.

Posible pa umanong magtuloy-tuloy ang taas-presyo sa susunod na linggo.

"Kung mangibabaw pa rin po 'yong kadahilanan ng production cut ng dalawang bansa and then pataas ang demand, maaari pong magtuloy-tuloy," ani Romero.

Samantala, sisimulan na ang pamimigay ng fuel subsidy sa mga driver at operator ng public transportation ngayong linggo.

"Target namin ay ma-implement ito within the next two days up to siguro, pinaka-latest nito ay September 15," ani Transport Secretary Jaime Bautista.

"Natanggap na namin ang pondo from [Department of Budget and Management]. Ang [Land Transportation Franchising and Regulatory Board] is working with different agencies," aniya.

Libu-libong piso ang ibibigay sa mga tsuper ng jeep, bus, taxi, tricycle, TNVS at delivery riders bilang ayuda dahil sa serye ng dagdag-presyo sa petrolyo.

— Ulat ni Alvin Elchico, ABS-CBN News