Watch more in iWantv or TFC.tv

Sari-sariling diskarte ngayon ang mga may-ari ng mga maliliit na negosyo dahil sa sipa ng inflation o mabilis na pagtaas ng presyo ng mga bilihin.

• Presyo ng gulay, isda, tumaas; habagat sinisi
• Sinisilbing kanin, ulam kumokonti sa mga karinderya; lugaw naging mabenta

Kasama rito ang mag-asawang Noel at Aceli Agatyon na nagbebenta ng kwek-kwek, hotdog, at calamares sa harap ng isang simbahan.

Dahil sa inflation, napilitan silang magtaas ng presyo ng patok nilang calamares dulot ng dagdag-presyo sa pusit at mantika.

Mula kasi sa P90 kada kilo ay umakyat sa P130 ang presyo ng pusit, habang P45 naman ang isang litrong mantika na dati’y P40.

"Kailangan lang magsikap at maganda ang pakikitungo sa mga customer," ani Noel.

Imbes na P3 kada piraso ang bentahan sa calamares ay ginawa itong P10 kada 3 piraso para makatubo ng pantustos sa pangangailangan ng kanilang limang anak.

Higit kalahati naman ang patong ni Melly sa kaniyang puwesto sa mga tiyangge.

Ibinenta niya ng P350 ang bestidang nakuha ng P140 mula sa supplier. Habang P150 naman ang benta niya sa sandals na binili niya lang sa merkado ng P55.

Dahil dito umabot sa halos P30,000 ang kabuuang kita niya mula sa P10,000 na puhunan. Nakabili pa siya ng sasakyan.

-- Ulat ni Apples Jalandoni, ABS-CBN News