(UPDATE) Mas malaki pa sa naunang tantiya ang itataas ng presyo ng diesel at gasolina sa Martes, ang ikatlong sunod na linggo na magkakaroon ng oil price hike.

Ayon sa abiso ngayong Lunes ng mga kompanya, narito ang mga ipatutupad nilang price adjustment:

Caltex (Alas-12:01 ng hatinggabi)
GASOLINA +P0.80/L
DIESEL +P3.10/L
KEROSENE +P1.70/L

Shell, Seaoil, Petron, Flying V (Alas-6 ng umaga)
GASOLINA +P0.80/L
DIESEL +P3.10/L
KEROSENE +P1.70/L

PTT Philippines, Petor Gazz, Jetti Petroleum, Phoenix Petroleum (Alas-6 ng umaga)
GASOLINA +P0.80/L
DIESEL +P3.10/L

Cleanfuel (Alas-8:01 ng umaga)
GASOLINA +P0.80/L
DIESEL +P3.10/L

Mas mataas ang mga inanunsiyong price hike kompara sa estimate ng mga kompanya ng langis noong nagdaang weekend na P2.40 hanggang P2.70 kada litro sa diesel at P0.30 hanggang P0.60 sa gasolina.

Watch more News on iWantTFC

Lalo pa umanong lumobo ang price increase dahil sa premium at paghina ng piso kontra dolyar.

Bumaba man umano ang presyo ng crude oil pero hindi pa sumusunod ang presyuhan sa Mean of Platts Singapore, na basehan ng presyo ng petrolyo sa Pilipinas.

Sa Metro Manila, simula Martes, maglalaro na sa P80 hanggang P95 ang diesel habang P77 hanggang P98 naman ang gasolina.

Tiniyak naman ng ACT Teachers Party-list na maghahain sila ng panukalang batas kaugnay sa unbundling o paghimay ng presyo ng petrolyo sa papasok na Kongreso.

Mula Enero 1 hanggang Hunyo 21, P44.24 na ang iminahal ng kada litro ng diesel, P29.50 sa gasolina at P39.65 sa kerosene.