Watch more in iWantv or TFC.tv

Mas dumami ang flights sa Clark International Airport papuntang ibang destinasyon matapos ang pagsasara ng Boracay sa mga turista.

Ayon sa pamunuan ng airport, tumaas ang bilang ng biyahe papuntang Busuanga sa Palawan, Puerto Princesa, Cebu, at Bohol.

Sa Busuanga halimbawa, 35 na ang flights kada linggo mula sa dating 28 flights.

Isa ang German national na si Stefan Werder sa mga turistang piniling pumunta sa Busuanga.

Ayon kay Werder, taon-taon siyang namamasyal sa Boracay ngunit napansin niyang dumarami na ang tao sa isla at dumurumi na rin ang dagat.

"I've been four times already in Boracay. The first time, it was nice, but then the last time I said it was disappointing," ani Werder.

[Apat na beses na akong nagpunta sa Boracay. Noong unang beses, maganda pa ito, pero noong huling bisita ko, nadismaya ako.]

Nitong Abril ay naitala ang pinakamaraming pasahero sa kasaysayan ng Clark Airport na umabot sa higit 240,000.

Inaasahan din na mas tataaas pa ang bilang ng mga pasahero ngayong taon dahil patuloy pang dumarami ang flights sa paliparan.

Samantala, tataas pa umano ang kapasidad ng airport sa 12 milyon na pasahero kapag natapos na ang bagong terminal nito sa 2020.

--Ulat ni Jacque Manabat, ABS-CBN News