Makakaranas ng mga pag-ulan ang Visayas, Mindanao at Palawan hanggang sa Araw ng mga Patay dahil sa umiiral na Intertropical Convergence Zone (ITCZ), ayon sa state weather bureau PAGASA.

Sa panayam ng DZMM, sinabi ni PAGASA meteorologist Glaiza Escullar na magdadala ang ITCZ ng mahina hanggang katamtamang mga pag-ulan at pagkidlat-pagkulog sa nasabing lugar.

Maaari anyang makaapekto ang ITCZ sa Cataduanes, Camarines Sur, Albay at Sorsogon sa Nobyember 1 at 2.

Samantala, makakaranas naman anya ang Cagayan, Isabela at Ilocos Norte ng makulimlim na panahong may mahinang pag-ulan.

Inaasahan naman ang mainit na panahon sa Metro Manila at nalalabing bahagi ng Luzon, ani Escullar.

Dagdag ng weather forecaster, isang low pressure area (LPA) ang maaaring mabuo sa labas ng Philippine area of responsibility ngayong Linggo at posibleng pumasok sa bansa sa mismong Undas. -- DZMM TeleRadyo, 30 Oktubre 2016