ITCZ magpapaulan sa malaking bahagi ng bansa

Tinututukan ng state weather bureau PAGASA ang isang tropical depression o mahinang bagyo sa labas ng bansa.

Alas-3 Lunes ng umaga, namataan ang bagyo 2,590 kilometro silangan ng extreme northern Luzon, ani PAGASA meteorologist Benison Estareja.

Hindi aniya papasok sa Philippine area of responsibility ang bagyo kaya wala itong direktang epekto sa bansa.

Gayunman, apektado aniya ang bansa ng Intertropical Convergence Zone (ITCZ) o kaulapan na dulot ng pagtatagpo ng hangin mula sa hilaga at timog malapit sa equator.

Dahil dito, makararanas ng maulap na kalangitan at mahinang hanggang katamtaman at kung minsa'y malakas na pag-ulan ang Visyas, Bicol, Hilagang Mindanao, Zamboanga peninsula at Caraga.

Iiral naman ang magandang panahon na may mga thunderstorm pagsapit ng hapon o gabi sa Metro Manila at nalalabing bahagi ng bansa.

Dagdag ni Estareja, binabantayan ng PAGASA ang ilang cloud cluster malapit sa bansa na maaaring maging low pressure area.

Nasa 2 hanggang 4 na bagyo ang inaasahang pumasok sa bansa sa Setyembre, banggit ng meteorologist.

Para sa iba pang ulat-panahon, bisitahin ang ABS-CBN Weather Center.

DZMM, 28 Agosto 2017