Hinihinalang mangangaso, patay nang lapain ng mga leon

ABS-CBN News

Posted at Feb 13 2018 07:02 PM

Stock Photo

Nilapa ng mga leon ang isang hinihinalang mangangaso malapit sa Kruger National Park sa South Africa, ayon sa pulisya roon.

Nakita ang ilang bahagi ng katawan ng biktima sa may talahiban ng isang pribadong game park sa Limpopo, isang probinsiya sa hilaga ng South Africa.

"It seems the victim was poaching in the game park when he was attacked and killed by lions. They ate his body, nearly all of it, and just left his head and some remains," ani Limpopo police spokesman Moatshe Ngoepe sa panayam ng Agence France-Presse.

(Mukhang nangangaso ang biktima nang atakihin siya at lapain ng mga leon. Halos kinain ang buong katawan niya at tanging ulo at ilang bahagi ng katawan ang natira.)

Nakita rin malapit sa bangkay ang isang baril na pangaso.

Tinutukoy pa ang pagkakakilanlan ng biktima. 

Noong nakaraang taon, ilang leon ang nilason sa parehong probinsiya kung saan natagpuan ang bangkay.

Pugot ang mga leon at wala na ring paws.

May mga gumagamit pa rin kasi ng mga katawan ng leon sa panggagamot.

Bukod sa leon, mainit din sa mga mangangaso ang mga rhinoceroses dahil sa horn o sungay nito.

Mabenta ito sa Tsina, Vietnam at iba pang bansa sa Asya dahil sa paniniwalang nakagagamot ito ng mga karamdaman.

© Isinalin mula sa ulat ng Agence France-Presse

Bisitahin ang Patrol.PH para sa iba pang mga balita.